Verkur er eitt af eðlilegum viðbrögðum líkamans sem gerir okkur viðvart um að líkaminn starfi ekki eðlilega eða um skaðlega utanaðkomandi þætti. Bráður verkur (einnig lýst sem skammvinnum verk) er yfirleitt viðvörunarboð og lífsnauðsynlegur. Hann verndar t.d. gegn bruna og sendir boð um áverka og sýkingar. Bráður verkur tengist áverka og hverfur þegar hann er gróinn eða læknaður og varir yfirleitt styttra en einn mánuð. Ef hins vegar verkurinn hverfur ekki löngu eftir að áverkar eru grónir eða læknaðir, er talað um að verkurinn sé langvinnur. Langvinnir verkir geta skapað veruleg vandamál og erfitt er að lifa með þeim.

Taugaverkir eru dæmigerðir langvinnir verkir sem orsakast af skemmdum á taugum, sem venjulega skynja verki, eða af skemmdum á þeim hluta taugakerfisins sem sendir verkjaboð, t.d. mænu eða heila.

Þessi tegund verkja sem kallast taugaverkur gegnir ekki verndarhlutverki bráðra verkja og hann þarf að greina og meðhöndla á réttan hátt.

Hvað orsakar taugaverki?
Fjöldi sjúkdóma/áverka getur beinlínis valdið taugaskemmdum sem leiða til taugaverkja, t.d. mænusigg (MS) og áverkar eftir slys. Aflimun er þekkt orsök fyrir taugaverk (draugaverkur í útlim).

Taugaverkur er einnig tiltölulega algengur fylgikvilli annarra sjúkdóma sem tengjast taugum. Þessir sjúkdómar eru m.a. sykursýki, ristill og verkir í mjóbaki. Þetta skýrir hvers vegna taugaverkir eru hugsanlega algengari orsök fyrir langvinnum verkjum en margir gera sér grein fyrir.